تری ذات ذات ثبات ہے

عارفانہ کلام حمدیہ کلام

تِری ذات ذاتِ ثبات ہے

تِرا راز رازِ حیات ہے

تِرا حسن حسنِ جہان ہے

تُو ہی مالکِ حسنات ہے

تِرا نور نورِ مبین ہے

تُو ہی کاشفِ ظلمات ہے

تُو بلندیوں کا ہے راستہ

تُو ہی رافع الدرجات ہے

تِرا قول قولِ حکیم ہے

تِری بات رمز کی بات ہے

تِرا ذکر ذکرِ لطیف ہے

تِری فکر فکرِ نشاط ہے

تِرا دین دینِ سلیم ہے

تِری راہ راہِ نجات ہے

تِری حمد کیا کرے آدمی

تِری ذات بالا صفات ہے

تِرا اسم اسمِ کفیل ہے

مِری آبرو تِرے ہاتھ ہے

احمد نواز