ہر طرف تیرگی تھی نہ تھی روشنی

 عارفانہ کلام حمد نعت منقبت

ہر طرف تیرگی تھی نہ تھی روشنی

آپﷺ آئے تو سب کو ملی روشنی

بزمِ عالم سے رخصت ہوئی ظلمتیں

جب حِرا سے ہویدا ہوئی روشنی

چاند سورج کا انساں پرستار تھا

آپؐ سے قبل اندھیرا تھی روشنی

سُوئے عرشِ علٰی مصطفیٰؐ کا سفر

روشنی کا طلب گار تھی روشنی

ہے وہ خورشیدِ اطلاق خیرالبشرﷺ

جس سے پاتا ہے ہر آدمی روشنی

خلقتِ اوّلیںﷺ، خاتم المُرسلیںﷺ

آپﷺ پہلی کرن، آخری روشنی

آپﷺ کے نقشِ پا سے ضیا بار ہیں

دھوپ، سورج، قمر، چاندنی روشنی

ایک اُمی لقب کا یہ اعجاز ہے

آدمی کو ملی علم کی روشنی

اعجاز رحمانی