مدحت کے پیالے سے ہوئی پیاس جگر دور

 عارفانہ کلام حمد نعت منقبت

مدحت کے پیالے سے ہُوئی پیاسِ جگر دُور

اور نُور کے ہالے سے ہوئی ظُلمتِ گھر دور

توصیفِ محمدﷺ سے زباں تر ہوئی، دل شاد

آنکھوں سے مِری ہو گئی دنیائے گُہر دور

مشغول ہُوا دل جو تِرےﷺ ذکر سے ہر دم

کافُور ہُوا شام کا غم،۔ فکر سحر دور

کہتے ہیں وہاں جا کے بدل جاتی ہے دُنیا

ادراک کی سرحد سے نکلتا ہے بشر دور

اک حسرتِ دیرینہ نگاہوں میں سجائے

آیا ہوں تِریﷺ سمت بہت نُور نظر دور

دُنیا میں اُجالوں کی نئی صبح کا آغاز

آمد سے تِریﷺ ہو گیا ظُلمات کا شر دور

عرفان! غُلامی کا سجا طوق گلے میں

ٹل جائے گی ہر ایک بلا، خوف و خطر دور

عرفان اللہ