اک میں ہی نہیں ان پر قربان زمانہ ہے

 عارفانہ کلام حمد نعت منقبت

اک میں ہی نہیں اُنؐ پر قربان زمانہ ہے​

جو ربِ دو عالم کا محبوبﷺ یگانہ ہے​

کل جس نے ہمیں پُل سے خود پار لگانا ہے​

زہرہؑ کا وہﷺ بابا ہے، سبطینؑ کا نانا ہے​

اس ہاشمیؐ دُولہا پر کونین کو میں وارُوں​

جو حسن و شمائل میں یکتائے زمانہ ہے

​عزت سے نہ مر جائیں کیوں نامِ محمدﷺ پر​

ہم نے کسی دن یُوں بھی دنیا سے تو جانا ہے​

ہُوں شاہِ مدینہﷺ کی میں پُشت پناہی میں​

کیا اس کی مجھے پروا دشمن جو زمانہ ہے​

سو بار اگر توبہ ٹُوٹی بھی تو کیا حیرت​

بخشش کی روایت میں توبہ تو بہانہ ہے​

محرومِ کرم اس کو رکھیے نہ سرِ محشر​

جیسا ہے نصیر! آخر سائل تو پُرانا ہے

سید نصیرالدین نصیر