خوشا کہ دیدہ و دل میں ہے جائے آل رسول

 عارفانہ کلام حمد نعت منقبت سلام

خوشا کہ دیدہ و دل میں ہے جائے آلِ رسولﷺ

زہے کہ وِردِ زبان ہے ثنائے آلِؑ رسولﷺ

اساسِ دینِ مبیں ہے وِلائے آلِؑ رسولﷺ

جو سچ کہوں تو ہے ایماں عطائے آلِ رسولﷺ

لیے ہے دامنِ دل میں عطائے آلِؑ رسولﷺ

تونگروں سے غنی ہے گدائے آلِؑ رسولﷺ

بہشت و کوثر و جامِ طہور کی ضامن

صدائے آلِ محمدﷺ، نوائے آلِؑ رسولﷺ

میں بُو ترابیؑ ہوں مجھ کو ملی ہے حُبِ علیؑ

مِرا وظیفہ ہے مدح و ثنائے آلِؑ رسولﷺ

یہ کیا مقامِ محبت ہے، کون سی منزل؟

جبینِ شوق ہے اور نقشِ پائے آلِؑ رسولﷺ

شہانِ دہر کا دریوزہ گر خدا نہ کرے

بڑے مزے سے ہوں زیر لوائے آلِؑ رسولﷺ

سرشکِ دیدۂ خوننابہ بار کیا، دل کیا

ہزار جانِ گرامی فدائے آلِؑ رسولﷺ

وہیں وہیں دلِ دیوانہ لوٹ لوٹ گیا

جہاں جہاں بھی ملا نقشِ پائے آلِؑ رسولﷺ

نفس نفس نئی کیفیتوں کا عالم ہے

نفس نفس میں ہے بُوئے ولائے آلِؑ رسولﷺ

خوشا نصیب دو عالم میں ہے لقب میرا

فقیرِ کوئے مدینہ، گدائے آلِؑ رسولﷺ

حافظ مظہرالدین مظہر