اے خدا تیری خدائی ہر جگہ

 عارفانہ کلام حمد نعت منقبت

اے خدا تیری خدائی ہر جگہ

تیری ہی جلوہ نمائی ہر جگہ

کُل کا تُو مختار ہے، رحمان ہے

اور مجبورِ محض انسان ہے

تُو ہی تُو ہے خالقِ کُل کائنات

ختم ہوتی ہے تُجھی پر ساری بات

چاند تاروں کی ضیا، مرضی تِری

آگ، پانی اور ہوا، مرضی تِری

کہکشاں، بادل، فلک، بن، لالہ زار

ہیں تِری قدرت کے ہی سب شاہکار

رزق دینے والا تُو، رزّاق تُو

کوئی بھی ثانی نہیں ہے، طاق تُو

مشرقین و مغربین و بحر و بر

سر نِگوں ہیں سارے تیرے حکم پر

تیری رحمت کا نہیں کوئی حساب

جس پہ چاہے کھول دے نعمت کے باب

جو بھی دیتا ہے بڑھا دیتا ہے تُو

مانگنے سے بھی سوا دیتا ہے تُو

اے خدا! بندہ غموں سے چُور ہے

رحم کر، قیصر بہت مجبور ہے

نورالعین قیصر قاسمی