آ کہ دل کی چاندنی روپوش ہے تیرے بغیر

 تیرے بغیر

آ کہ دل کی چاندنی روپوش ہے تیرے بغیر

آ کہ سازِ زندگی خاموش ہے تیرے بغیر

آ کہ زہر اب بادۂ سرجوش ہے تیرے بغیر

ہے خزاں آلودہ صبح گلستاں تیرے بغیر

عید ہو تم کو مبارک ہاں مگر میرے لیے

زندگی کیا ہے وبال دوش ہے تیرے بغیر

جلوۂ سرو سمن میں اب کہاں وہ دل کشی

خندۂ گل ہے طبیعت پر گراں تیرے بغیر

غرق حسرت ہے دلِ نا شادماں تیرے بغیر

آ کہ محروم طرب ہوں جان جاں تیرے بغیر

رو رہے ہیں غنچہ و برگ و شجر تیرے بغیر

باغ کی ساری فضا ہے نوحہ گر تیرے بغیر

اک بسیط احساس محرومی مری ہر سانس میں

کر رہا ہے زندگی کو مختصر تیرے بغیر

آ کہ اب تاریک ہے سارا جہاں تیرے بغیر

دل کو آئے کیا محبت میں سکوں تیرے بغیر

ہو گئے عقل و خِرد نذر جنوں تیرے بغیر

دل ہے اور آٹھوں پہر اک وحشت بے اختیار

آنکھ ہے اور بارش سیلاب خوں تیرے بغیر

آ کہ رسوا ہے مِرا حال زبوں تیرے بغیر

جوہر نظامی