اس نے دیکھا جو مجھے عالم حیرانی میں

 اس نے دیکھا جو مجھے عالمِ حیرانی میں

گر پڑا ہاتھ سے آئینہ پریشانی میں

آ گئے ہو تو برابر ہی میں خیمہ کر لو

میں تو رہتا ہوں اسی بے سر و سامانی میں

اس قدر غور سے مت دیکھ بھنور کی جانب

تُو بھی چکرا کے نہ گر جائے کہیں پانی میں

کبھی دیکھا ہی نہیں اس نے پریشاں مجھ کو

میں کہ رہتا ہوں سدا اپنی نگہبانی میں

وہ مِرا دوست تھا دشمن تو نہیں تھا فیصل

میں نے ہر بات بتا دی اسے نادانی میں

فیصل عجمی