خاک مجھ میں کمال رکھا ہے

عارفانہ کلام نعتیہ کلام

خاک مجھ میں کمال رکھا ہے

مصطفیٰؐ نے سنبھال رکھا ہے

میرے عیبوں پہ ڈال کر پردہ

مجھ کو اچھوں میں ڈال رکھا ہے

میم سے مرضِ ہر دوا ہو کر

ہر مصیبت کو ٹال رکھا ہے

تیرے صدقے تِرے کرم نے کریم

مجھ کو جگ میں خوشحال رکھا ہے

اُنؐ کی رحمت نہیں فقط ہم پر

غیر کا بھی خیال رکھا ہے

دال سے دافعِ بلا ہیں یہ

یوں محمدؐ میں دال رکھا ہے

اُنؐ کے جلوؤں میں خود خدا کی قسم

رب نے اپنا جمال رکھا ہے

عاصیو! رب نے اُنؐ سے ملنے کو

نقش پائے بلالؓ رکھا ہے

دے کے دلبر کو رب نے اپنا جمال

پاس اپنے جلال رکھا ہے

اک تِری یاد کے سوا میں نے

دل سے سب کچھ نکال رکھا ہے

مصطفیٰؐ کی شبیہ حسینؑ و حسنؑ

نام پردے میں آلؑ رکھا ہے

کوئی کہہ دے نہ اُنؐ کو ہم جیسا

یوں اُنہیںؐ بے مثال رکھا ہے

جو فقیرانِ شاہِ بطحٰاﷺ ہیں

اُنؐ کی گڈری میں لال رکھا ہے

تیراﷺ اعجاز! کب کا مر جاتا

تیرے ٹکڑوں نے پال رکھا ہے

اعجاز احمد