عارفانہ کلام حمد نعت منقبت
صاف لکھا ہے سرِ لوحِ جبیں آپﷺ کا ہوں
میرے آقاﷺ میں کسی کا بھی نہیں آپﷺ کا ہوں
کرۂ عشق سے باہر بھی حضور آپﷺ کا تھا
کرۂ عشق میں جب سے ہوں مکیں آپﷺ کا ہوں
مجھ کو بہکائے گا کیا جلوۂ دنیا کا فریب
میرا ایمان کی حد تک ہے یقیں آپﷺ کا ہوں
سب کو ہے ناز غلامی پہ بڑی طاقتوں کی
میرا اعزاز کہ میں خاک نشیں آپﷺ کا ہوں
اس کی خوشبو کی دھنک ہے سرِ افلاک سلیم
حق تعالیٰ نے عطا کی ہے زمیں، آپﷺ کا ہوں
سلیم کوثر
No comments:
Post a Comment