درد دل کوئی نہ سمجھے تو پھر اس داد پہ تھو

 دردِ دل کوئی نہ سمجھے تو پھر اس داد پہ تُھو

مطلبی حلقۂ احباب کی تعداد پہ تھو

حاکمِ وقت تِرے دستِ لہو رنگ پہ تُف

تُو کہ حاکم نہیں جلاد ہے، جلاد پہ تھو

تُو کہ اے زود فراموش ہمیں بھول گیا

تیری یادوں میں تڑپتے دلِ ناشاد پہ تھو

دیکھ کر جُبہ و دستار تِرا فیصلہ بدلا

محتسب تیرے اسی دوغلے ارشاد پہ تھو

تم کہ اک بہن کو اغیار سے چھڑوا نہ سکے

ایسی طاقت پہ بھی، کثرتِ افراد پہ تھو

تُو نے افرنگ کی تہذیب سے دل شاد کیا

تیری اس سوچ پہ اس نقطۂ آزاد پہ تھو

کتنے معصوم یہاں دولتِ دل ہار گئے

عشقِ ناکام تِرے کوچۂ آباد پہ تھو

جو ستم سہ کے بھی شاہوں کے قصیدے لکھے

ایسے فنکار تِری قسمتِ برباد پہ تھو

تُو نے پہرے دئیے شاہوں کے شبستانوں پہ

غازئ وقت ترے سینۂ فولاد پہ تھو

تُو نے مجبور فقیروں کو گداگر سمجھا

ایسے کم ظرف سخی تیری ہر امداد پہ تھو

اک قصیدے کے طلبگار نے دی داد صفی

دولتِ شہر کے وارث تِری اس داد پہ تھو

صفی ربانی