دانستہ کر کے ترکِ سفر رو پڑے ہیں ہم
کس کو ہمارے غم کی خبر رو پڑے ہیں ہم
سمجھے تھے اہلِ بزم کہ ہم مسکرائیں گے
یہ بھی ہے اک فریبِ نظر رو پڑے ہیں ہم
آنکھوں کے سامنے وہی منزل ہے دار کی
یاد آئی تیری راہ گزر، رو پڑے ہیں ہم
فصلِ بہار آئی تو یہ بھی ستم ہوا
ہنسنے لگے ہیں زخمِ جگر رو پڑے ہیں ہم
کیا کیا امیدیں لے کے گزاری تھی شامِ غم
دیکھا مگر جو رنگِ سحر رو پڑے ہیں ہم
اب تاج مل گیا ہے ہمیں منصبِ حیات
ہے انتہا خوشی کی مگر رو پڑے ہیں ہم
فاطمہ تاج
No comments:
Post a Comment