عارفانہ کلام حمد نعت مقبت
دیدارِ کردگار ہے، معراجِ مصطفٰیﷺ
ہم سب پہ آشکارہے، معراجِ مصطفٰیﷺ
درمانِ قلبِ زار ہے، معراجِ مصطفٰیﷺ
بے شک لِقائے یار ہے، معراجِ مصطفٰیﷺ
رخشندہ، تابدار ہے، معراجِ مصطفٰیﷺ
در قلب، مشکبار ہے، معراجِ مصطفٰیﷺ
اہلِ نظر کے واسطے مہمیزِ شوق ہے
اک بادِ نوبہار ہے، معراجِ مصطفٰیﷺ
سیرت کی ہر کتاب میں آقاﷺ کی، جا بجا
اک بابِ زر نگار ہے، معراجِ مصطفٰیﷺ
جانے میں اور آنے میں کتنی لگی تھی دیر
لمحوں پہ استوار ہے، معراجِ مصطفٰیﷺ
بُرّاق کی وہ سُرعتِ رفتار دیکھنا
عقل و خرد کے پار ہے، معراجِ مصطفٰیﷺ
قلبِ سلیم نے نہ اٹھایا کوئی سوال
ہر بےیقیں کی ہارہے، معراجِ مصطفٰیﷺ
یہ واقعہ حضورﷺ کی عظمت کی ہے دلیل
ہم سب کا افتخار ہے، معراجِ مصطفٰیﷺ
سیدہ زینب سروری قادری
No comments:
Post a Comment