دل میں جو ہے محبت ناموس مصطفیٰ

 عارفانہ کلام حمد نعت منقبت

دل میں جو ہے محبتِ ناموسِ مصطفیٰﷺ

قائم کریں گے حُجتِ ناموسِ مصطفیٰﷺ

سرمائے کی طلب ہے، نہ جاہ و جلال کی

دل میں اگر ہے دولتِ ناموسِ مصطفیٰﷺ

ایمان کی اَساس یہی،۔ اصلِ دِیں یہی

اُلفت خدا کی، اُلفتِ ناموسِ مصطفیٰﷺ

اَسرارِ معرفت کُھلے اس خوش نصیب پر

جس پر کُھلی حقیقتِ ناموسِ مصطفیٰﷺ

حفظِ وطن کو سر بکف، سینہ سپر رہیں

یہ بھی تو ہے حفاظتِ ناموسِ مصطفیٰﷺ

قومی زعیم جتنے ہیں، ہیں مجتمع یہاں

اس کا سبب ہے نسبتِ ناموسِ مصطفیٰﷺ

ہے قوم ان کے فہم و تدبر کی منتظر

جن کو ملی بصیرتِ ناموسِ مصطفیٰﷺ

ہم جان وار سکتے ہیں محمود! بے خطر

کرتے ہوئے حفاظتِ ناموسِ مصطفیٰﷺ

راجا رشید محمود