اس کرم کا کروں شکر کیسے ادا

 عارفانہ کلام حمد نعت منقبت

اس کرم کا کروں شکر کیسے ادا جو کرم مجھ پہ میرے نبیﷺ کر دیا

میں سجاتا تھا سرکارؐ کی محفلیں مجھ کو ہر غم سے رب نے بری کر دیا

ذکر سرکارﷺ کی ہیں بڑی برکتیں، مل گئیں راحتیں، عظمتیں، رفعتیں

میں گنہ گار تھا بے عمل تھا مگر مصطفیٰﷺ نے مجھے جنّتی کر دیا

لمحہ لمحہ ہے مجھ پر نبیؐ کی عطا دوستو اور مانگوں میں مولا سے کیا

کیا یہ کم ہے میرے خدا نے مجھے اپنے محبوبﷺ کا اُمتی کر دیا

جو در مصطفیٰﷺ کے گدا ہو گئے دیکھتے دیکھتے کیا سے کیا ہو گئے

ایسی چشم کرم کی ہے سرکارﷺ نے دونوں عالم میں ان کو غنی کر دیا

جو بھی آیا ہے محفل میں سرکارؐ کی حاضری مل گئی جس کو دربار کی

کوئی صدیقؓ و فاروقؓ و عثماںؓ ہُوا اور کسی کو نبیﷺ نے علیؑ کر دیا

کوئی مایوس لوٹا نہ دربار سے جو بھی مانگا ملا میرے سرکارؐ سے

صدقہ جاؤں نیازی میں لجپال کے، ہر گدا کو سخی نے سخی کر دیا

عبدالستار نیازی