یہی جاری ہے ہر لب پر فداک یارسول اللّٰہ

 عارفانہ کلام حمد نعت منقبت

یہی جاری ہے ہر لب پر فِداکَ یا رسول اللّٰہﷺ

ہماری جاں ہمارا گھر فداک یا رسول اللّٰہﷺ

مِرے یٰس، مِرے فُرقاں، ہمارا آپﷺ ہی ایماں

مِرے ہادی، مِرے رہبر، فداک یارسول اللّٰہﷺ

ہر اک خُو سب سے عالی ہے، زمانے سے نرالی ہے

حبیبِ خالقِ اکبرﷺ فداک یا رسول اللّٰہﷺ

خدا نے ہم کو جو بخشا، ہے سب کچھ آپ کا صدقہ

ہمارا سارا مال و زر فداک یا رسول اللّٰہﷺ

مہ و خورشیدِ تاباں ہوں، ملائک حور و غلماں ہوں

جہاں کے سارے خشک و تر فداک یا رسول اللّٰہﷺ

کٹے ناموسِ والا پر، مِرے آقاﷺ ہمارا سر

یہی ہے آرزو یکسر فداک یا رسول اللّٰہﷺ

اہانت جو بھی کرتے ہیں، فضائل سے جو جلتے ہیں

وہی ہیں ارذل و ابتر فداک یا رسول اللّٰہﷺ

بنے طیبہ نگر مسکن، بقیعِ پاک ہو مدفن

یوں ہوجائیں نثارِ در فداک یا رسول اللّٰہﷺ

مشاہد محوِ مدحت ہے، طلبگارِ شفاعت ہے

مِرے حامی مِرے یاور فداک یا رسول اللّٰہﷺ

مشاہد رضوی