قبلہ و کعبۂ ایمان رسول عربی

 عارفانہ کلام حمد نعت منقبت

قبلہ و کعبۂ ایمان رسولِ عربیﷺ

دو جہاں آپؐ پہ قربان رسولِ عربی

چاند ہو تُمؐ تو رسولانِ سلف تارے ہیں

سب نبیؑ دل ہیں تو تمؐ جان رسولِ عربی

صدقہ حسنینؑ کا روضہ پہ بلا لو مجھ کو

ہند میں ہوں میں پریشان رسولِ عربی

کس کی مشکل میں تِریؐ ذات نہ آڑے آئی

تیرا کس پر نہیں احسان رسولِ عربی

کوئی بہتر ہے تُوؐ بہتر سے بھی بہتر تو ہے

سب سے اعلیٰ ہے تِریؐ شان رسولِ عربی

تیراﷺ دیدار ہے دیدار الٰہی مجھ کو

تیریﷺ اُلفت مِرا ایمان رسولِ عربی

مجمعِ حشر میں اس شان سے آئے بیدم

ہاتھ میں ہوں تِراؐ دامان رسولِ عربی

بیدم شاہ وارثی