نگاہِ رحمت اٹھی ہوئی ہے وہ سب کی بگڑی بنا رہے ہیں

 عارفانہ کلام حمد نعت منقبت

نگاہِ رحمت اٹھی ہوئی ہے وہ سب کی بگڑی بنا رہے ہیں

کھلا ہوا ہے کریم کا در، بھرے خزانے لٹا رہے ہیں

فلک کا سینہ دمک رہا ہے زمیں کا گلشن مہک رہا ہے

چھڑے ہیں صلِ علیٰ کے نغمے حضورؐ تشریف لارہے ہیں

نہ انﷺ سا کوئی عظیم دیکھا، نہ ایسا درِ یتیم دیکھا

زمانہ ٹھکرا رہا ہے جن کو، انہیں وہ سینے لگا رہے ہیں

کرے گا یہ حشر بھی نظارا بنیں گے مشکل میں وہ سہارا

کریں گے سب انتظار ان کا، وہ آرہے ہیں وہ آ رہے ہیں

بروزِ محشر بوقت پرسش مجھے جو دیکھا فرشتے بولے

ادھر پریشان کیوں کھڑے ہو تمہیں تو آقاﷺ بُلا رہے ہیں

نبیﷺ کی توصیف اللہ اللہ کہ داد جبریل دے رہا ہے

ظہوری کیا خوش نصیب ہیں جو نبیؐ کی نعتیں سنا رہے ہیں

محمد علی ظہوری