غلامان محمد کی بڑی توقیر ہے لوگو

 عارفانہ کلام حمد نعت منقبت

غلامانِ محمدﷺ کی بڑی توقیر ہے لوگو

کہ جو جس بزم میں ہے شمعِ پُر تنویر ہے لوگو

اسی کے پرتوِ انوار سے فکر و نظر روشن

مِرا آقاﷺ مجسّم نور کی تصویر ہے لوگو

وہؐ جس کے نام پر صلِ علیٰ کہنا عبادت ہے

اسیِ کا نام ساقِ عرش پر تحریر ہے لوگو

لسانُ الغیب ہے وہ، حاملِ اسرارِ وحدت ہے

کلام اسﷺ کا کلام اللہ کی تفسیر ہے لوگو

شریعت اسﷺ کی بنیادِ دساتیرِ اُمم ٹھہری

یہ وہ قانونِ ناطق ہے کہ عالمگیر ہے لوگو

جمیل اللہ کا احسان ہے ہر حال میں خوش ہے

یہ عشقِ سیدِ کونینﷺ کی تاثیر ہے لوگو

جمیل نقوی