ہر درد کی دوا ہے صل علیٰ محمد

 عارفانہ کلام حمد نعت منقبت 

ہر درد کی دوا ہے صلِ علیٰ محمدﷺ

تعویذ ہر بلا ہے  صلِ علیٰ محمدﷺ

محبوبِ کِبریا ہے صلِ علیٰ محمدﷺ

کیا نقشِ خوشنما ہے صلِ علیٰ محمدﷺ

قربِ خدا ہو حاصل جنت میں ہو وہ داخل

جس نے لکھا پڑھا ہے صلِ علیٰ محمدﷺ

جنت مقام ہو گا،۔ دوزخ حرام ہو گا

گر دل پہ لکھ لیا ہے صلِ علیٰ محمدﷺ

اس کی نجات ہو گی رحمت بھی ساتھ ہو گی

جو پڑھ کے مر گیا ہے صلِ علیٰ محمدﷺ

جو دردِ لا دوا ہو یہ گھول کر پلا دو

کیا نسخہ شفا ہے صلِ علیٰ محمدﷺ

کاندھا بدلنے والو،۔ ہمراہ چلنے والو

پڑھتے چلو روا ہے صلِ علیٰ محمدﷺ

جانے بھی دے ارم کو رضوان نہ روک ہم کو

سینے پہ لکھ لیا ہے صلِ علیٰ محمدﷺ

منزل کا ہے بھروسہ اکبر بغل میں توشہ

کیا خوب لے چلا ہے صلِ علیٰ محمدﷺ

 اکبر وارثی میرٹھی