جنتی عورتیں
جنتی عورتوں سے تو میرا علاقہ نہیں
جنتی عورتو
اپنی جنت میں آباد ہو
شاد ہو؟
اپنے صیاد کو یاد ہو؟
خیر، زندان کی ان حدوں تک تو آزاد ہو
جن کے باہر کھڑا میں تمہیں
ایسے تکتا ہوں جیسے کوئی
جار میں بند رنگین ان تتلیوں کو تکے
جو یہیں پر اگائی گئیں ہیں
تمہیں دیکھ کر
میرے ہاتھوں کی سب حسرتیں
میری آنکھوں سے جھڑنے لگی ہیں
انہیں دیکھ لو
جنتی عورتو
صرف دیکھو مگر
تم انہیں تھامنے کی جسارت
نہ کرنا
کہ میں وحشتی
حیرتی
وہ جہنم ہوں
جس میں خدا نے کئی جنتیں جھونک دیں
عمار اقبال
No comments:
Post a Comment