اپنی نگاہ کو آزاد کر دو

 جب گیلیلیو نے بتایا تھا

کہ دنیا سورج کے گِرد طواف کرتی ہے

تو راہب اور پروہت اور کاہن

اپنی اپنی زنگ آلود تلواروں کے ساتھ

میدان میں اتر آئے تھے

لیکن پھر سائنس نے بھی ثابت کر دیا

کہ زمین پیہم گردش میں ہے

کسی نامعلوم وقت سے

انتھک، مسلسل

اور کائنات کا پھیلاؤ

ہمارے تخیّل کی پہنچ سے دور ہے

تو یوں کرو کہ اب

عقیدے کی کتاب کو چوم کر

دل کے اس مقام پر رکھ دو

جہاں محبت بسیرا کرتی ہے

یہاں یہ محفوظ رہے گی

اسے نہ تو کسی نظریہ سے خطرہ ہو گا

نہ ہی کسی اور عقیدے کے وار سے

اس کتاب کے ساتھ وہ سارے بوسے

زندہ رہیں گے

جو تم نے

اور تمہارے پُرکھوں نے

اس کی پیشانی پر ثبت کیے

بس اتنا کرو

کہ اپنی نگاہ کو آزاد کر دو

اسے وہ سب کچھ دیکھنے دو

جو تمہارے آس پاس ہے

جو عقیدے کی دیوار کے اس پار

انسانوں نے تمہارے لیے

اور تمہارے بچوں کے لیے

تخلیق کیا ہے

یہ سب جو تم دیکھ رہے ہو

برت رہے ہو

یہ عقیدہ نہیں، علم ہے

کوثر جمال