عظیم الشان ہے شان محمد

عارفانہ کلام نعتیہ کلام

عظیم الشان ہے شانِ محمدﷺ

خدا ہے مرتبہ دانِ محمدﷺ

کتب خانے کیے منسوخ سارے

کتابِ حق ہے قرآنِ محمدﷺ

نبیؐ کے واسطے سب کچھ بنا ہے

بڑی ہے قیمتی جانِ محمدﷺ

شریعت اور طریقت اور حقیقت

یہ تینوں ہیں کنیزانِ محمدﷺ

فرشتے بھی یہ کہتے ہیں کہ ہم ہیں

غلامانِ غلامانِ محمدﷺ

نبیﷺ کا نطق ہے نطقِ الہٰی

کلامِ حق ہے فرمانِ محمدﷺ

خدا کا نور ہے نور پیمبرﷺ

خدا کی شان ہے شانِ محمدﷺ

ابوبکرؓ و عمرؓ و عثمانؓ و حیدرؓ

یہی ہیں چار یارانِ محمدﷺ

علیؑ ان میں وصیِ مصطفیٰؐ ہے

علیؑ ہے رنگِ بستان محمدﷺ

علیؑ و فاطمہؑ شبیرؑ و شبرؑ

بسا ان سے گلستانِ محمدﷺ

بتاؤں کوثری کیا شغل اپنا

میں ہوں ہر دم ثنا خوانِ محمدﷺ

کوثر علی کوثری (دلو رام کوثری)