زندہ دلانِ وادئ کشمیر زندہ باد
اے ترجمانِ غیرتِ شبیر زندہ باد
تیری شجاعتوں کے ترانے فضاؤں میں
عشق و جنوں کی بولتی تصویر زندہ باد
ظلم و ستم کے سامنے سینہ سِپر ہے تُو
ہے لب پہ تیرے نعرۂ تکبیر زندہ باد
بھارت نے گرچہ ظلم کی حدیں ہی توڑ دیں
ہمت تیری ہے صدق کی تنویر زندہ باد
لا ریب، تُو ہے عظمتِ احرار کا امیں
ان کے سنہرے خواب کی تعبیر زندہ باد
مداح تیرے آج ہیں سب حریت پسند
اے حرفِ حُر کی گونجتی تفسیر زندہ باد
گِرنے کو ہے یہ ظُلم کی دیوار باالیقین
ہے ٹُوٹنے کو کُفر کی زنجیر زندہ باد
اک دن بنے یہ خطۂ کشمیر ارضِ پاک
ہے یہ دعائے خالدِ شبیر زندہ باد
خالد شبیر احمد
No comments:
Post a Comment