اے ختم رسل مکی مدنی کونین میں تم سا کوئی نہیں

 عارفانہ کلام نعتیہ کلام

اے ختمِ رُسل مکی مدنیﷺ کونین میں تم سا کوئی نہیں

اے نورِ مجسم تیرے سوا محبوبﷺ خدا کا کوئی نہیں

اوصاف تو سب نے پائے ہیں پر حسن سراپا کوئی نہیں

آدم سے جناب عیسیٰ تک سرکارﷺ کے جیسا کوئی نہیں

یہ شان تمہاری ہے آقاﷺ، تم عرش بریں پر پہنچے ہو

ذیشان نبیؑ ہیں سب لیکن معراج کا دولہاﷺ کوئی نہیں

دل کس کو دکھائیں چیر کے ہم عصیاں کا مداوا کون کرے

اے رحمت عالمﷺ تیرے سوا دکھیوں کا مسیحا کوئی نہیں

خیرات محمدﷺ سے پا کر اس ناز سے کہتے ہیں منگتتے

دکھیوں پہ کرم کرنے والا سرکارﷺ سےاچھا کوئی نہیں

مالک ہیں وہؐ دونوں عالم کے ہر ذرہ منور ہے انﷺ سے

تنویرِ مجسم سیدِ کلﷺ آقاﷺ کے علاوہ کوئی نہیں

ہو جائے اگر اک چشم کرم محشر میں فنا کی لاج رہے

اے شافعِ محشرؐ تیرے سوا بخشش کا وسیلہ کوئی نہیں

فنا بلند شہری