عارفانہ کلام حمد نعت منقبت
رہی عمر بھر جو انیسِ جاں وہ بس آرزوئے نبیﷺ رہی
کبھی اشک بن کے رواں ہوئی، کبھی درد بن کے دبی رہی
شہ دیںﷺ کے فکر و نگاہ سے مٹے نسل و رنگ کے فلسفے
نہ رہا تفاخرِ منصبی،۔۔ نہ رعونتِ نسبی رہی
سرِ دشتِ زیست برس گیا، جو سحابِ رحمتِ مصطفٰیﷺ
نہ خرد کی بے ثمری رہی، نہ جنوں کی جامہ دری رہی
تھی ہزار تیرگی فتن، نہ بھٹک سکا مِرا فکر و فن
مِری کائناتِ خیال میں نظرِ شہِ عربیﷺ رہی
وہ صفا کا مہرِ منیر ہے ، طلب اس کی نورِ ضمیر ہے
یہی روزگارِ فقیر ہے، یہی التجائے شبی رہی
وہی ساعتیں تھیں سرور کی ، وہی دن تھے حاصل زندگی
بحضور شافعِﷺ امتاں مِری جن دنوں طلبی رہی
حفیظ تائب
No comments:
Post a Comment