ظہور اول ظہور آخر ظہور شمس و قمر سے پہلے

 عارفانہ کلام حمد نعت منقبت

ظہورِ اول، ظہورِ آخر، ظہورِ شمس و قمر سے پہلے

انہیؐ کا چرچا تھا لامکاں میں ہجومِ شام و سحر سے پہلے

مِرے نبیؐ کو بنا کے رحمت، خدا نے بھیجا ہے کل جہاں میں

کرم کی کلیاں چٹک رہی ہیں، چمن میں شاخِ کرم سے پہلے

یہ کہکشاں تو غبارِ رہ ہے، حضورﷺ کی رفعتیں نہ پوچھو

نصیب چمکے تھے عرش والو، ورودِ خیرالبشرﷺ سے پہلے

انہیؐ کے نقشِ قدم سے کیا کیا چراغ روشن ہیں شہرِ جاں میں

ذرا یہ پوچھو تو ہمنشینو! کسی کے قلب و جگر سے پہلے

وہؐ جانتے ہیں، تڑپ رہا ہے غریب شاعر پسِ حوادث

چراغِ رہ بھی ضرور دیں گے حضورؐ اذنِ سفر سے پہلے

جہان والو! بغور سن لو! مرے بھی آقاؐ ہیں شاہِ طیبہ

سنیں گے فریاد بے کسوں کی، فغانِ خونِ جگر سے پہلے

ہے سامنے روضۂ مبارک مگر نگاہیں جھکی ہوئی ہیں

نصابِ حُبِ نبیؐ تو پڑھ لے، کہو تم اپنی نظر سے پہلے

بڑے ادب سے درود پڑھ کر سلام کہنا، ضرور کہنا

دعاؤ آقاؐ کے در پہ جانا، حدودِ بابِ اثر سے پہلے

صبا ابھی تک درِ نبیؐ پر کھڑی ہے میری بیاض لے کر

کلام میرا پہنچ چکا ہے، ریاض مجھ بے ہنر سے پہلے

مری متاعِ ہنر یہی ہے،۔ ریاض زادِ سفر یہی ہے

جو اشک جلتے ہیں میری آنکھوں کی چلمنوں میں سحر سے پہلے

ریاض! نامہ سیہ ہے اپنا مگر تمنا ہے عاصیوں کی

عقیدتوں کے ہوں پھول دامن میں میرے حکمِ سفر سے پہلے

ریاض حسین چودھری