عارفانہ کلام حمد نعت منقبت
رحمت دو جہاں ہیں محمدﷺ
راحت قلب و جاں ہیں محمدﷺ
سر کون و مکاں ہیں محمدﷺ
معنی کن فکاں ہیں محمدﷺ
محسن انس و جاں ہیں محمدﷺ
مامن ایں و آں ہیں محمدﷺ
نور سے ان کے معمور ہے دل
شمع محراب جاں ہیں محمدﷺ
رافت و لطف و جود و سخا کا
قلزم بے کراں ہیں محمدﷺ
ان کے احسان کیا کیا گنائیں
شافع عاصیاں ہیں محمدﷺ
یہ حقیقت ہے اظہر من الشمس
ہادئ ہر زماں ہیں محمدﷺ
اس بلندی پہ کوئی نہ پہنچا
جلوہ فرما جہاں ہیں محمدﷺ
ذکر قران میں ہے یہ شاہد
خاتم مُرسلاں ہیں محمدﷺ
ہارون شاہد
No comments:
Post a Comment