تائید کم نسب میں زباں تولتے نہیں

 عارفانہ کلام حمد نعت منقبت

تائیدِ کم نسب میں زباں تولتے نہیں

جب تک علیؑ نہ دل میں ہوں ہم بولتے نہیں

جب تک نہ ظرفِ قلب ہو آلودگی سے پاک

ہم اس میں حُبِّ آلؑ کا رس گھولتے نہیں

یہ کہہ کے توڑ ڈالے علیؑ نے بتوں کے سر

کیسے خدا یہ ہیں جو کبھی بولتے نہیں

پہچان کتنی سہل ہے نفسِ رسولؐ کی

جب تک نہ ذکرِ حق ہو علیؑ بولتے نہیں

آلِ نبیؐ کے ذکر سے خالی ہو جو کتاب

اُتری ہو عرش سے بھی تو ہم کھولتے نہیں

آئینوں میں یہ وصفِ علیؑ کیسے آ گیا

پتھر ہیں اور جھوٹ کبھی بولتے نہیں

کم اصل اِس لیے ہے نگاہوں کو نا پسند

ہم جھوٹے موتیوں کو کبھی رولتے نہیں

میزانِ حُبِّ آلؑ کو جو چاہے دیکھ لے

دنیا میں اِک ہمیں ہیں جو کم تولتے نہیں

وحیدالحسن ہاشمی