قبولیت بتائے گی کہ کیا ہیں فاطمہ زہرا

عارفانہ کلام حمد نعت منقبت قصیدہ در مدح بی بی فاطمہؑ

قبولیت بتائے گی کہ کیا ہیں فاطمہ زہراؑ

اثر کے آسمانوں کی دعا ہیں فاطمہ زہراؑ

یہ اپنے دم سے کرتی ہیں رسالت کی مسیحائی

یمن کی صرف چادر ہے شفا ہیں فاطمہ زہراؑ

دل ختم الرسلﷺ ہیں مخزن اسرار ربانی

اسی دل کے دھڑکنے کی صدا ہیں فاطمہ زہراؑ

علیؑ ہے عرش اعظم کی قسم ہر ایک مشکل میں

علیؑ کے واسطے مشکل کشا ہیں فاطمہ زہراؑ

یہ جب چاہیں حدید خاک کو فضہ بنا ڈالیں

علوم کیمیا کا مدرسہ ہیں فاطمہ زہراؑ

بقیعہ کی زیارت کو سمجھنا ہو تو یوں سمجھو

حسینؑ ابن علیؑ کی کربلا ہیں فاطمہ زہراؑ

کبھی ان سے مِرا اللہ راضی ہو نہیں سکتا

مسلمانوں میں جن جن سے خفا ہیں فاطمہ زہراؑ

شفاعت کی گھڑی ہے میں ہوں اور میدان محشر ہے

بھروسہ ایک اشک غم ہے یا ہیں فاطمہ زہراؑ

کرم ہے آپ کا بی بی وہیں ہے آپ کا نیر

جہاں پر آیتیں محو ثناء ہے فاطمہ زہراؑ

عباس رضا نیر