عشق احمد میں جو کٹی ہو گی

عارفانہ کلام نعتیہ کلام

عشقِ احمدؐ میں جو کٹی ہو گی​

زندگی تو وہ زندگی ہو گی​

جس کے دل عظمتِ نبی ہو گی​

اس پہ رحمت برس رہی ہو گی​

ان پہ جس کی نظر لگی ہو گی​

اس کی جھولی سدا بھری ہو گی

​جو غلامی میں ان کی کامل ہے​

اس پہ قرباں شہنشہی ہو گی​

اُن کی رحمت ہو جس پہ ابرِ کرم​

اس کی کھیتی سدا ہری ہو گی​

آبیاری ہو جس کی نسبت سے​

بیل منڈوے وہی چڑھی ہو گی​

جس سے راضی رہیں مرے سرکار​ؐ

اس کو کس چیز کی کمی ہو گی​

جس کے دل میں ہو شمعِ حُبِ نبی​ؐ

قبر میں اس کی روشنی ہو گی​

آپؐ آتے ہیں جب تصور میں​

بندگی سر جھکا رہی ہو گی​

آپﷺ کا نامِ پاک سنتے ہی​

زندگی مسکرا رہی ہو گی​

جس کی نظروں میں ان کا جلوہ ہے​

اس کی معراج تو یہی ہو گی​

ان کے در جس کی حاضری ہو گی​

اس کی بگڑی وہیں بنی ہو گی​

حشر میں ہو گی وہ جبیں روشن​

ان کے قدموں میں جو دھری ہو گی​

ساتھ ساتھ ان کے حشر میں ہو گا​

ان سے نسبت اگر قوی ہو گی​

کیوں نہ محشر میں سرفراز رہیں​

اپنی نسبت جو قادری ہو گی​

روبرو رب کے ہر نبی کی نظر​

آپ کی سمت ہی اٹھی ہو گی​

رحم فرمائیے غلاموں پر​

آپؐ کی بندہ پروری ہو گی​

آپؐ ہی سے ہے آس شانِ خدا​

آپؐ چاہیں تو بہتری ہو گی​

اے اجل چپکے چپکے آ جانا​

ان کی جب یاد آ رہی ہو گی​

اس میں سرکار آتے ہیں ثاقب​

نعت کی بزم جب سجی ہو گی​

​

ثاقب صابری