عارفانہ کلام نعتیہ کلام
مجھ کو طلب کیا گیا، سرکارﷺ آ گیا
شرمِ گُنہ لیے، یہ گنہگار آ گیا
پھیلا کے اپنا دامنِ صد چاک اے حضورؐ
درویشِ بے نوا سرِ دربار آ گیا
سوکھی پڑی تھیں کب سے تمنا کی کھیتیاں
گریہ مثالِ ابرِ گہر بار آ گیا
اس پیکرِ سوال کو کیا حاجتِ سوال
فیض و عطا کے شہر میں نادار آ گیا
ٹھوکر جہاں لگی کوئی، میں جھومنے لگا
کانٹا کوئی چُبھا تو مجھے پیار آ گیا
سکے جراحتوں کے لیے غم کے شہر سے
دلبر تِری عطا کا خریدار آ گیا
اپنا وجود سارا لُٹا کر بہ راہِ شوق
تیری تجلیوں کا طلبگار آ گیا
نعیم صدیقی
No comments:
Post a Comment