قربان ہو رہی ہے مری جاں ادھر ادھر

 قربان ہو رہی ہے مِری جاں اِدھر اُدھر

واں رہ پہ ہے جو زلفِ پریشاں ادھر ادھر

جاتے ہیں جب وہ سُوئے چمن سیر کے لیے

ہوتے ہیں ساتھ عاشق نالاں ادھر ادھر

ہیں لختِ دل کہیں، تو کہیں پارۂ جگر

رہتے ہیں پیش چشمِ گلستاں ادھر ادھر

ہنگامۂ جنوں سے جو دونوں ہوئے ہیں چاک

دامن ادھر ادھر ہے گریباں ادھر ادھر

زلفیں چھٹی ہوئی ہیں جو چہرے پہ دو طرف

لہرا رہے ہیں افعیٔ پیچاں ادھر ادھر

دیکھا انہوں نے مردہ مجھے میں نے اشکبار

آئے نظر ہیں خواب پریشاں ادھر ادھر

یا دشمنوں سے قطع ہو یا مجھ سے ترکِ ربط

کیوں دل کو کر رہے ہو مِری جاں ادھر ادھر

مطرب وہاں ہیں جمع نوا ساز اس طرف

ہوتے ہیں کل سے عیش کے ساماں ادھر ادھر

کیوں کر کروں میں بات چپ و راست یار کی

رہتے ہیں ساتھ ساتھ نگہباں ادھر ادھر

وہ اپنی ہٹ پہ ہیں مجھے اپنے کہے کی ضد

سمجھا رہے ہیں دونوں کو انساں ادھر ادھر

آنکھوں پہ سائباں ہیں مزے دید کے ہوں کیا

پھیلے ہوئے ہیں دامنِ مژگاں ادھر ادھر

وہ بت ہے میں ہوں صاحبِ دیں بہرِ فیصلہ

ہوتے ہیں جمع گبر و مسلماں ادھر ادھر

وہ چاہتے ہیں آئیں میں کہتا ہوں آپ جاؤں

کس لطف پر ہے رغبتِ احساں ادھر ادھر

نالاں وہ اقربا سے میں ہوں مخبروں سے تنگ

کس کس طرح کے دل میں ہیں ارماں ادھر ادھر

ہرجائی ان کو کہتے ہیں بے شرم مجھ کو لوگ

اٹھتے ہیں رات دن یہی طوفاں ادھر ادھر

منظور ہے جو رنجشِ سابق کا فیصلہ

ہر روز جمع ہوتے ہیں مہماں ادھر ادھر

ہیں پہلوؤں میں داغ جو دونوں طرف نسیم

جلوہ دکھا رہے ہیں گلستاں ادھر ادھر

نسیم دہلوی