عارفانہ کلام نعتیہ کلام
یا نبیﷺ دیکھا ہے رُتبہ آپﷺ کی نعلین کا
عرش نے چُوما ہے تلوا آپﷺ کی نعلین کا
آپؐ کی خدمت کا مجھ کو کاش مل جاتا شرف
باندھتا آنکھوں سے تسمہ آپﷺ کی نعلین کا
آپﷺ کے قدموں کی نرمی قلب پر محسوس کی
جب بھی میں نے نقش دیکھا آپﷺ کی نعلین کا
حشر میں جب لوگ چُومیں آپﷺ کا دستِ کرم
سب سے چُھپ کر لوں میں بوسہ آپؐ کی نعلین کا
روزِ محشر سر پہ سورج جب سوا نیزے پہ ہو
ایک نیزے پہ ہو سایہ آپﷺ کی نعلین کا
جس سے آگے جائیں تو جل جائیں پر جبریلؑ کے
اس سے آگے جانا دیکھا آپﷺ کی نعلین کا
تاج کیوں نہ بھیک مانگے آپﷺ کی نعلین کی
تاجور کھاتے ہیں صدقہ آپﷺ کی نعلین کا
صبیح رحمانی
تمام احباب کو جشنِ مولود نبیﷺ مبارک ہو۔
No comments:
Post a Comment